Rezension für Frau Dr. Al Dreihi op kölsch
Do küss an ner OP wäge Grauer Star nit mih vörbei?
Minge Tipp: Gangk bei de Frau Dr Al Dreihi.
Die es en Spezialistin, wat dat aangeiht,
die dat - un noch vill mih - us'em eff-eff kann un versteiht.
En Ääztin met Hätz un Empathie.
Leev Patiente, wat wollt ehr mih?
OPs, do hät ne jede flöck Belder em Kopp,
un denne setz der OP-Opklärungsboge dann noch eine drop.
Do frögs dich: Wellste dat wirklich, muss dat wirklich sin?
Ich gevv zo, dat ich ne Schisser ben.
Ovschüns et normal es, wann mer dat sich ängstige deit,
besonders, wann et dobei öm ding Auge geiht.
Mer weed vörav, för ruhig ze blieve, ganz höösch sedeet.
Su kritt mer noch vill met, un dat fing ich nit verkeet.
Mer litt dann stell un brav do, möglichst ohne ze wibbele.
Mer merk beinoh nix, hüchstens villleich e klitzeklein Kribbele,
wann der Laser dann kütt an de Reih
- un dann es die OP em Rubbedikabess ald widder vörbei.
Donoh noch regelmäßige Kontroll,
ov alles su es wie et soll
Ich bedank mich vun Hätze bei däm ganze OP-Schmölzche,
jede Einzelne ze nenne, do köm ich vun Stöckche op Hölzche.
Ich dät widder bei de Frau Dr. Al Dreihi gonn,
wann widder ens Saache met minger Äugelche aanstonn.
Дата опыта: 27 October, 2026
Дата опыта: 27 October, 2026